2 қазанда А.Қ. Құсайынов атындағы Еуразия гуманитарлық институтында Қазақстан Республикасының Жоғары білім беру қызметкерлері күніне арналған салтанатты іс-шара өтті.
Мерекелік бағдарлама салтанатты марапаттау рәсімінен басталды. Көп жылғы адал еңбегі, кәсіби шеберлігі және институттың дамуына қосқан үлесі үшін профессор-оқытушылар құрамы мен ЕАГИ қызметкерлері А.Қ. Құсайынов атындағы Еуразия гуманитарлық институтының 30 жылдығына арналған мерейтойлық медальмен марапатталды. Сондай-ақ институт қызметкерлеріне ЕАГИ басшылығының алғыс хаттары табысталды.
Мерекелік іс-шара Жастар ісі жөніндегі комитеттің белсенді студенттері дайындаған концерттік бағдарламамен жалғасты. Шығармашылық және музыкалық қойылымдар, студенттердің жүрекжарды құттықтаулары ерекше мерекелік көңіл күй сыйлап, оқытушылардың еңбегі, білімі мен қолдауы үшін білдірілген шынайы алғысқа ұласты.
Іс-шара институттың оқытушыларын, қызметкерлері мен білім алушыларын бір ортаға біріктіріп, қатысушыларға жарқын әсер мен көтеріңкі көңіл күй сыйлады. Бұл мерекелік күн болашақ мамандарды даярлаудағы, білім беруді дамытудағы және жаңа ұрпақты қалыптастырудағы жоғары білім беру саласы қызметкерлерінің маңызды рөлін тағы бір мәрте айқындады.
