2026 жылғы 20 ақпанда А.Қ. Құсайынов атындағы Еуразия гуманитарлық институтында мектеп және колледж түлектеріне арналған Ашық есік күні ұйымдастырылды. Іс-шараға қаладағы 20 орта мектеп пен колледжден 300-ден астам оқушы қатысты.
Кездесу барысында талапкерлерге институттың білім беру бағдарламалары, даярлау бағыттары, оқу үдерісінің ерекшеліктері, академиялық ұтқырлық мүмкіндіктері мен студенттерге ұсынылатын білім беру инфрақұрылымы туралы жан-жақты ақпарат берілді.
Шара аясында кафедралар ұйымдастырған шеберлік сабақтары қатысушылардың ерекше қызығушылығын тудырды. Оқытушылар мен студенттер практикалық сабақ элементтерін ұсынып, түрлі білім беру бағыттары бойынша кәсіби дағдыларды таныстырды. Қонақтар жоғары оқу орнындағы заманауи интерактивті сабақ форматымен танысып, білім беру үдерісінің мазмұнын тереңірек түсінуге мүмкіндік алды.
Сонымен қатар талапкерлер профессор-оқытушылар құрамымен жүздесіп, студенттік өмір, ғылыми үйірмелер мен шығармашылық бірлестіктердің жұмысы туралы мәлімет алды.
Ашық есік күні мазмұнды әрі іскерлік атмосферада өтіп, болашақ талапкерлерге өздерін қызықтырған сұрақтарға жауап алуға және кәсіби бағдарын айқындауға маңызды мүмкіндік берді.
