ЕАГИ ҚЫЗМЕТКЕРЛЕРІ МЕН ПОҚ-ҚА АРНАЛҒАН ШЕТЕЛДІК ХАЛЫҚАРАЛЫҚ ЗЕРТТЕУ ТАҒЫЛЫМДАМАСЫ

Шетелдік халықаралық зерттеу тағылымдамасы — қызметкерлер мен профессор-оқытушылар құрамының (ПОҚ) кәсіби және зерттеушілік құзыреттерін дамыту, халықаралық ғылыми байланыстар орнату, бірлескен ғылыми жарияланымдар дайындау және халықаралық жобаларды іске асыру мақсатында шетелдік университеттерде, ғылыми-зерттеу орталықтарында, зертханаларда және басқа да бейінді ұйымдарда ғылыми-зерттеу тағылымдамасынан өту мүмкіндігі.

Тағылымдама халықаралық және ұлттық қаржыландыру бағдарламалары шеңберінде, сондай-ақ қызметкердің жеке қаражаты немесе қабылдаушы тараптың қаражаты есебінен жүзеге асырылуы мүмкін.

Кімдер қатыса алады?

Халықаралық зерттеу тағылымдамасына:

• профессор-оқытушылар құрамы;
• ғылыми қызметкерлер;
• кәсіби немесе ғылыми дамуға байланысты қызмет атқаратын әкімшілік және Институттың басқа да қызметкерлері;
• қолданыстағы ғылыми жобалары мен гранттары бар қызметкерлер қатыса алады.

Қаржыландыру нұсқалары

Қатысушы тағылымдаманы қаржыландырудың өзіне қолайлы көзін дербес таңдайды. Халықаралық зерттеу тағылымдамасы стипендия, грант, гранттық қаржыландыру немесе басқа да қаржылық қолдау болған жағдайда жүзеге асырылуы мүмкін.

1. Халықаралық бағдарламалар мен стипендиялар

Қызметкерлер мен ПОҚ академиялық және ғылыми ұтқырлықтың халықаралық бағдарламаларына қатыса алады, оның ішінде: Erasmus+; TÜBİTAK; COST; Türkiye Scholarships (Türkiye Bursları); «Болашақ»; DAAD; шетелдік университеттер мен ғылыми ұйымдардың халықаралық зерттеу гранттары мен стипендиялары; ғылыми-зерттеу немесе академиялық ұтқырлықты қаржыландыруды көздейтін басқа да халықаралық бағдарламалар.

Негізгі шарт — қатысушының тиісті стипендияны, грантты немесе басқа да қаржыландыру түрін өз бетінше иеленуі және тиісті бағдарламаның талаптарын сақтауы.

2. ҚР Ғылым және жоғары білім министрлігінің ғылыми гранттары

ПОҚ пен ғылыми қызметкерлер Қазақстан Республикасының Ғылым және жоғары білім министрлігі қаржыландыратын іске асырылып жатқан ғылыми жобалары шеңберінде де халықаралық зерттеу тағылымдамасынан өте алады.

Оның ішінде:

• гранттық қаржыландыру (ГҚ);
• бағдарламалық-нысаналы қаржыландыру (БНҚ);
• нысаналы қаржыландыру және ғылыми зерттеулерді қаржыландырудың өзге де түрлері;
• халықаралық ғылыми ұтқырлыққа, тағылымдамаларға, іссапарларға немесе зерттеуге байланысты басқа да іс-шараларға шығындарды қарастыратын ұлттық ғылыми бағдарламалар мен жобалар.

Бұл жағдайда шетелге шығу мүмкіндігі тиісті ғылыми жобаның шарттарына, сметасына және қаржыландыру қағидаларына сәйкес айқындалады.

3. Қабылдаушы тараптың қаржыландыруы

Тағылымдама шетелдік қабылдаушы университеттің, ғылыми-зерттеу орталығының, зертхананың, халықаралық ұйымның немесе басқа да серіктес ұйымның қаражаты есебінен жүзеге асырылуы мүмкін.

Бұл жағдайда қызметкер қабылдаушы тараптан тағылымдаманың мерзімі, мақсаты, бағдарламасы, сондай-ақ қаржыландыру шарттары көрсетілген ресми шақыру хатын алуы тиіс.

4. Жеке қаражат

Қызметкер халықаралық зерттеу тағылымдамасынан өз қаражаты есебінен де өте алады.

Бұл жағдайда сапарды Институтпен алдын ала келісу және болу мақсаты мен тағылымдама бағдарламасын растайтын құжаттарды ұсыну қажет.

Халықаралық зерттеу тағылымдамасының мақсаттары

Тағылымдама келесі мақсаттарға бағытталуы мүмкін:

• ғылыми зерттеулер жүргізу;
• шетелдік ғылыми дерекқорлармен, архивтермен, зертханалармен және зерттеу ресурстарымен жұмыс істеу;
• халықаралық ғылыми конференцияларға, семинарларға, симпозиумдар мен форумдарға қатысу;
• ғылыми мақалаларды дайындау және жариялау;
• монографияларды дайындау және жариялау;
• шетелдік зерттеушілермен бірлескен ғылыми жарияланымдар дайындау;
• бірлескен зерттеу жобаларын іске асыру;
• халықаралық ғылыми ынтымақтастықты дамыту;
• шетелдік университеттермен және ғылыми ұйымдармен жаңа серіктестік байланыстар орнату;
• тәжірибе алмасу және шетелдік озық тәжірибелерді зерделеу;
• бірлескен білім беру және ғылыми жобаларды әзірлеу.

Тағылымдамадан өтетін орынды қалай табуға болады?

Егер қызметкер шетелдік университетті, ғылыми ұйымды немесе зерттеу орталығын алдын ала таңдаған болса, қабылдаушы тараппен өз бетінше байланысып, ресми шақыру хатын алуы қажет.

Егер тағылымдамадан өтетін нақты орын әлі анықталмаған болса, қызметкер:

• халықаралық ғылыми және академиялық платформалар арқылы шетелдік ұйымды өз бетінше таңдай алады;
• Институттың халықаралық серіктестеріне жүгіне алады;
• Институт ынтымақтастық орнатқан шетелдік университеттер мен ғылыми ұйымдардың байланыстарын пайдалана алады;
• Халықаралық ынтымақтастық және интернационалдандыру департаментіне консультация алу үшін жүгіне алады;
• халықаралық ұтқырлықтың мүмкін болатын бағдарламалары, қабылдаушы ұйымдар және тағылымдамадан өту мүмкіндіктері туралы ақпарат алу үшін Халықаралық ынтымақтастық және интернационалдандыру департаментіне өтінім қалдыра алады.

Қажетті құжаттар

Егер тағылымдамадан өтетін орын алдын ала анықталған болса, келесі құжаттарды ұсыну қажет:

1. қабылдаушы тараптың ресми шақыру хаты;
2. тағылымдаманың мақсаты, мерзімі және негізгі іс-шаралары көрсетілген зерттеу тағылымдамасының бағдарламасы немесе жоспары;
3. паспорттың көшірмесі;
4. тағылымдаманы қаржыландыру көзі туралы ақпарат;
5. қажет болған жағдайда грантты, стипендияны немесе басқа да қаржыландыру түрін алғанын растайтын құжаттар.

Тағылымдамадан кейін

Халықаралық зерттеу тағылымдамасы аяқталғаннан кейін қызметкер Халықаралық ынтымақтастық және интернационалдандыру департаментіне келесі растайтын құжаттардың көшірмелерін ұсынуға міндетті:

• орындалған жұмыс және тағылымдама нәтижелері туралы есеп;
• тағылымдама бағдарламасы;
• қатысуды/тағылымдамадан өткенін растайтын сертификат немесе басқа да құжат;
• барып-қайту авиабилеттерінің немесе басқа да жол жүру құжаттарының көшірмелері;
• болған жағдайда — жарияланымдар, конференция материалдары, бірлескен ғылыми әзірлемелер, алғыс хаттар немесе тағылымдаманың басқа да нәтижелері.

Халықаралық тағылымдаманың нәтижелері институттың халықаралық ғылыми ынтымақтастығын дамытуға, бірлескен жобалар мен жарияланымдар дайындауға, гранттық өтінімдер әзірлеуге және жаңа серіктестік келісімдер орнатуға пайдаланылуы мүмкін.