Қазақстан Республикасы жоғары оқу орындарының ғылыми кітапханалары қауымдастығы Л. Н. Гумилев атындағы Еуразия ұлттық университетінде кітапхана басшыларымен дөңгелек үстел өткізді. Кездесу барысында қатысушылар заманауи кітапхана ісінің өзекті әрі күрделі мәселелерін талқылады.
Маңызды шешімдердің бірі — Қауымдастық Жарғысының қабылдануы болды. Осыған байланысты бірлестіктің құрамы кеңейіп, оған мектептер мен колледждердің кітапханаларының да мүше болуына мүмкіндік берілді. Отырыс барысында өңірлік құрылымдардың басшылары тағайындалып, олардың ағымдағы қызметтік міндеттері айқындалды.
Қатысушылар Қауымдастық қызметінің негізгі бағыттарын талқылады. Олардың қатарында кәсіби қолдау көрсету, нормативтік-құқықтық қамтамасыз ету, автоматтандыру, жасанды интеллект, цифрлық трансформация, ақпараттық ресурстарға қолжетімділік, халықаралық ынтымақтастық және қоршаған ортамен өзара байланыс мәселелері бар. Әр бағыт бойынша міндеттер белгіленіп, алдағы жұмыстың басымдықтары айқындалды.
Алғашқы сөзді Қауымдастықтың жаңадан сайланған президенті Б. Ә. Оразаев сөйледі. Ол кітапханалардың, кітапхана қызметкерлерінің және баспа басылымдарының маңыздылығын атап өтті. Сонымен қатар «Оқитын ұлт» платформасын жүзеге асыру аясында қатысушыларды бір реттік мәдени-ақпараттық іс-шаралармен шектелмей, жүйелі әрі мазмұнды жұмыстар жүргізуге назар аударуға шақырды.
А. Қ. Құсайынов атындағы Еуразия гуманитарлық институтының ғылыми кітапханасының меңгерушісі Г. Х. Абдигазиева қатысушыларға атқарылған кітапханалық жұмыстар туралы ақпарат беріп, электрондық ақпараттық ресурстардың қызметіне тоқталды. Атап айтқанда, кітапхана пайдаланушылардың ақпараттық қажеттіліктерін қанағаттандыру үшін «E-UNI» және «Scopus» базалары мен платформаларының, сондай-ақ тиісті келісімдер аясында қолжетімді «Library, ENU», «Library.nu.edu.kz» және «Kazneb» ресурстарының мүмкіндіктерін пайдаланып отырғанын атап өтті.
Қазақстанның кітапхана ісінің халықаралық аренадағы беделін нығайту мақсатында қатысушылар Қауымдастық қызметінің маңызы мен алдағы жоспарларын қарастырды. Кәсіби даму, жаңа әдістемелерді енгізу, жұмыс тиімділігін арттыру, инклюзия мәселелерін шешу және жаңа оқырмандық орта қалыптастыру бағыттары бойынша пікір алмасты.
Өңірлердің өкілдері кітапханалардың материалдық-техникалық базасының жай-күйіне, заманауи жабдықтарды пайдалану мен жаңа технологиялық шешімдерді енгізу қажеттілігіне де назар аударды. Талқылау қорытындысы бойынша кітапханалық қызметтерді жетілдіру және заманауи кітапхана инфрақұрылымын дамыту жөніндегі алдағы жұмыс бағыттары айқындалды.
